La Casa sogn Giusep ei alla bial’entschatta, igl onn 1910,
vegnida baghegiada per in auter intent, numnadamein
sco hotel cul num Park Hotel Compadials e cuort sissu sut
il num Hotel Badus. Suenter haver midau pliras ga
patrun daventa quel 1932 possess dalla Caritas da Turitg.
L’idea da fundar ina casa da vegls ei pli tard naschida
ord il ravugl d’ina cumissiun seconstituida ils anno 1941 sut
il num Ovra d’agid Surselva cugl intent da gidar ils paupers
en nossa regiun.
.....Igl onn 1946 cumpra l’Ovra sociala d’agid, dirigida
da sur Maurus Brucker, il Hotel Badus cun la finamira da
fundar ina casa per vegls ed impedi. 1948 decida la
cumissiun cun consentiment digl uestg da Cuera da midar
l’ovra en ina fundaziun ecclesiastica, l’emprema casa
da vegls catolica en Surselva. Cronicas e protocols paleisan
d’impurtontas decisiuns e d’in fervent sestentar per
adina puspei adattar quella bial’ovra sociala als basegns
e damondas dil temps. Ei seigi numnau cheu mo
entgins tiarms:
......Ella secunda mesadad dils onns 40: indrez dil
scaldament central. 1960 erecziun d’ina biala caplutta
ligiada cul baghetg principal. 1972 tochen 1973
emprema gronda renovaziun ed engrondida dil baghetg
principal. 1988 erecziun dalla caffetaria. 1999 tochen
2000 renovaziun extendida dalla Casa sogn Giusep.
2004 sil plaunterren: midada dalla veglia sala da magliar
en stanzas da cussadents. 2005 sil plaun sutterran:
construcziun da dus locals da sentupada e d’activitads.